Pormal nang nagkaroon ng kasunduan ang Cignal TV sa government-owned TV station na People’s Television (PTV-4) para sa pag-ere ng mga laro ng Gilas Pilipinas sa 2023 FIBA Basketball World Cup.
Ayon kay Cignal First Vice President Head of Channels and Content Sienna Olaso, ginawa ito ng Cignal upang masiguro na mas maraming Pilipino ang makakapanood ng mga laro ng pambansang koponan sa pamamagitan ng free TV.
“Meron kaming niluluto ng kaunti for Gilas Pilipnas games to be actually seen on PTV4. We were graciously allowed by our partners from FIBA to air it para mas marami ang makakapanood,” saad ni Olaso.
Dagdag nya, "We extended our offer to PTV 4 to actually carry it either live or delayed. We just want to make sure that every Filipino will have a chance to watch it.".
Maliban kay Olaso, present din sa naganap na press conference ng Philippine Sportswriters Association (PSA) sa Rizal Memorial Sports Complex sina Head Business Development-Cignal TV Miguel Vea, Content Manager-Cignal TV Paulo Fernandez, MD FIBA Media Andrew Ryan, and COO FIBA Media Stephanie Mignot.
Maliban sa PTV-4, mapapanood din ang mga laro sa TV5, One Sports, One Sports+, PBA Rush, Cignal pay-per-view, Smart LiveStream, Cignal Play at Pilipinas Live.