Hidilyn Diaz, bibigyan ng condo

Magbibigay ang Megaworld Corporation ng condo kay Olympic gold medalist Hidilyn Diaz na nagkakahalaga ng P14 milyon.

Bukod diyan makakatanggap si Diaz ng P10 milyon mula sa gobyerno at P2.5 milyon mula sa Zamboanga na kaniyang hometown dahil nakasulat ito sa batas, P10 milyon mula kay MVP Sports Foundation Chairman Manny V. Pangilinan, P10 milyon mula kay Ramon S. Ang, P3 milyon mula kay deputy speaker Mikee Romero, at bahay at lupa sa Tagaytay City. 

Gumawa ng kasaysayan para sa bansang Pilipinas ang itinuturing ng "Queen of Philippine Weightlifting" na si Hidilyn Diaz.

Nakuha ni Hidilyn ang unang olympic gold para sa bansa sa 55kg weightlifting event sa Tokyo 2020 Olympics ngayong Lunes.

Nakapag-record ng 224kg si Diaz na itinuturing na isang Olympic record para maselyohan ang panalo para sa bansa. Ang kanyang gold medal-winning lift na 127kg ay itinuturing din na isang Olympic record.

Ito ang unang gold medal na nasungkit ng bansa mula ng unang sumali ito noong 1924 Summer Games, 96 na taon na ang nakakalipas.